Таниқли стилист Шохрух Мусаев билан интервью
14.11.2017
Ёш бўлса-да, ўз мухлисларига эга, стилист Шохрух Мусаев бизнинг блогимизга берган эксклюзив интервьюсида аёлларнинг эркак стилистларга мурожаати сабаблари ҳақида сўзлаб берди.
Бу соҳага қандай кириб келгансиз? Ишни нимадан бошлагансиз?
Албатта, бу соҳада эркак кишининг ишлаши бироз ғалати туюлиши мумкин. Лекин ҳозирги пайтда буни замон талаби десак ҳам бўлади. Бу соҳага кириб келишим тасодиф бўлган. Устозимнинг олдига бориб юрганимда, у киши рафиқасини тубдан ўзгартирганини кўриб ҳайратга тушганман. Уларнинг ўзгача услубда ишлаши менда бу соҳага янада қизиқишимни орттирган.
Касбингизда сизга нима кўпроқ ёқади?
Мен ҳар куни ўнлаб мижозлар билан ишлайман. Улар стилист столига ўтирганида сиздан нимадир кутади ва ўзини сизга ишониб топширади. Мана шу ишонч менга куч беради. Ишлаётганимда бутун вужудим билан улар учун образ яратишга ҳаракат қиламан. Ўзларини бошқа қиёфада кўрган мижозларим ойнага қараганда ёниб кетишларини кўриш - мен учун бахт.
Нима учун инсонлар ўз ташқи қиёфаларини стилистларга ишониб топширади? Бу қизиқишми ёки...
Кўнглимдаги саволни бердингиз...Агар кузатган бўлсангиз, кўпинча аёллар эркак стилистларга мурожаат қилишади ва улардан янгилик кутишади. Бунинг сабаби оддий. Чунки эркак стилистлар аёлларда биз кўришни хоҳлаган томонларни яратади, деб ўйлашади.Ҳақиқатан ҳам мен ҳар бир образни яратишда ўзимга ёқадиган услубларни ишлатаман. Бу эса албатта, ўз самарасини беради.
Машҳур шахслар билан ишлашингизнинг сири нимада?
Бу ҳақда ўйлаб кўрмаган эканман... Менимча, шоу бизнес вакиллари доимо халқ назарида эканлигидан бўлса керак. Улар учун янгидан – янги ва такрорланмас образларни яратишга ҳаракат қиламан. Доимо янгилик қидириб ишлаганингиз сайин тажрибангиз ва маҳоратингиз ортиб боради. Шу боис ҳам менга юртимиз севган санъаткор ва актёрлар билан ишлаш мароқли. Улардан айниқса, Асал Шодиева, Халимахон Ягона, Нигора Каримбоеваларнинг образларини яратишда кўп изланаман ва албатта, такрорланмас ва табиий образ яратишга ҳаракат қиламан. Кечалари ухламасдан, хаёлимда ўзимча қиёфа кашф этаман ва уни синаб кўраман. Бу албатта, мижозларимга маъқул келади.
Сиз ўз ташқи кўринишингизни қандай сақлайсиз?
Мижозлар олдида ташқи кўриниш жуда катта аҳамиятга эга. Сизнинг кийинишингиз, қоматингиз, ҳаттоки, қандай атирдан фойдаланишингиз ҳам уларни қизиқтиради. Шу боис ҳам доимий спорт билан шуғулланаман. Спорт нафақат одамга соғломлик бахш этади, балки, яхши кайфият ва руҳий тетиклик ҳам беради.
Нимадан ҳеч қачон воз кечмаган бўлардингиз?
Одамийликдан! Инсонмизми, бир – биримизга меҳр – оқибатли, садоқатли бўлишимиз керак. Одамгарчилик бу катта фазилат. Мана шундай фазилат эгаларини жуда ҳурмат қиламан ва қадрлайман.
Сиз нимани ўзингизнинг асосий ютуғингиз деб ҳисоблайсиз?
Менинг ютуғим – бу касбимдир. Касбимни чин маънода жуда севаман. Инсон ҳаётда нимагадир эришишни истаса, ўз қилаётган ишини жон – дилдан яхши кўриши лозим. Ана шундагина муваффақиятларга эриша оласиз.
Нима деб ўйлайсиз, кундалик ҳаётда аёл қиёфасини нима “қутқара олади”?
Бу саволингизга бир сўз билан жавоб беришим мумкин: табиийлик. Иш тажрибамдан шуни айтишим мумкинки, инсонга берилган гўзаллик ҳамма нарсадан устун. Унга озгина жило берилса, етарли.
2018 йилда қандай тренд оммабоплик чўққисида бўлади? Бу ҳақдаги фикрингиз.
Мода оламини кузатган бўлсангиз, йилдан – йилга табиийликка эҳтиёж кучайиб бораяпти. Табиийроқ кўринишдаги makeupлар, соч турмаклари... Келаётган йилимизда бўлғуси келинлар образида ёйилган ва тўлқинсимон соч турмаклари урфда бўлади.
Оилангиз ҳақида гапириб беринг.
Менинг кичиккина оилам бор. Мен, хотиним ва ўғлим. Рафиқам билан тасофан танишиб қолганмиз. Мана тақдир экан, биргаликда бахтли яшаяпмиз.
Эшитимизча, ҳозирги пайтда макияж билан ҳам шуғуллана бошлабсиз. Шу ҳақда ҳам гапириб беринг.
2016 йилнинг охирида мен Сочида “Георгий Кот” Халқаро гўзаллик академиясида малака ошириб келдим. Шундан сўнг ўз соҳамга нисбатан буткул фикрим ўзгарди. Ўзимни макияж борасида синаб кўриш иштиёқи кучайди. Макияж билан шуғуллана бошлаганимдан кейин тушундимки, мижозларимнинг талаби мана шу соҳага кучлироқ экан. Макияж борасида ҳали устозим йўқ, лекин бунда рассомчилик бўйича мутахассислигим жуда асқотди. Мукаммал макияжда косметиканинг ўрни жуда муҳим. Мен макияжда Maybelline, Loreal Paris, Bourjois, Max Factor, Mac Anastasia, Forever, Sleek, Nyx Freedom косметикаларидан фойдаланаман.
Дунё стилистлари ичида сиз ёқтирган фаворитларингиз борми?
Албатта, бор. Энг таниқли стилистлардан бири Георгий Котни ўз ишининг чинакам устаси деб биламан.
Бизнинг ўқувчиларимизга тилакларингиз?
Гўзаллик - дунёни қутқаради. Шундай экан, барча аёлларимизга тилагим, сизларни аёллик бахти ҳеч қачон тарк этмасин!
instagram: https://www.instagram.com/shoxamusayev/?hl=ru
facebook: https://www.facebook.com/shoxa.musaev.3
Журналист Гавҳар Саодатова
Асосий тенденцияларни makeup.uz билан бирга кузатинг. Бизни маслахатларимиз ва ечилиш улулларимизни бошкаларга курсатинг, ҳамда нашрларимзга ўзизни фикрингизни изоҳларда тўлдиринг! Телеграм-каналимизга, facebook ва instagram га аъзо бўлинг.