Диана Нуритдинова билан интервью
15.06.2017
Визажист, "Miss Di MakeUp Studio" номли хусусий макияж студияси асосчиси ва соҳибаси, шу билан бирга, севимли она ва турмуш ўртоқ – Диана Нуритдинова пойтахтимизда Miss Di тахаллуси билан машҳур. Диана ижодий фешн-лойиҳаларнинг доимий иштирокчиси бўлиб келади, ўз ишининг усталари ҳамда ҳаваскорларга макияж сирларини ўргатади, шунингдек, аёлларни ўзларининг севимли машғулотлари билан шуғулланишларига руҳлантиради. Miss Di нинг ўзига ким илҳом беради, унинг гўзаллик сирлари нимада ва ўз ишининг устаси пардоз-андоз сумкасида нималарни сақлайди... Булар ҳақда бизнинг эксклюзив интервьюмиз орқали билиб олинг.
Сиз юртимиздаги энг таниқли визажистлардан бирисиз. Муваффақиятингизга нима сабаб бўлган, деб ўйлайсиз?
Ўйлайманки, муваффақиятларимга сабаб – севимли ишимга жуда нозик ёндашишимдадир. Мен ўзимни барчага ўхшамайман, деб ҳисоблайман ва ҳар сафар буни ўз ишларим ва мижозларимга муносабатимда исботлайман. Мен учун ҳамма нарсани сифатли ва яхши, жуда катта меҳр, қалб билан, шунингдек, сифатли косметика ёрдамида бажариш муҳим. Барча нарсани чиройли амалга оширишни яхши кўраман. Аммо ҳали жуда кўп ўрганишим керак. Шунчалик кўп ўрганишим лозимки, ҳаракат, интилишларим ҳам камаймаслиги зарур.
Трендларнинг доимий ўзгариб туришига қандай қарайсиз? Уларга тез-тез амал қилиб турасизми?
Трендлар ва янгиликларга ижобий қарайман, чунки бу дунёнинг ҳаракатда бўлишини ва мунтазам ривожланиб боришини таъминлайди. Мен янги ечимлар, янгиликлар ва маркалар бозорда пайдо бўлиши, уларнинг ўзларини намойишлар ва шоулар орқали тақдим қилишлари тарафдориман. Бу билан ҳаётимиз янада ёрқинроқ ва қизиқарлироқ кечади. Менинг трендлар борасида ўз қарашларим бор. Уларга ўзимнинг “мен” им орқали боқишга ҳаракат қиламан. Трендларнинг барчасига кўр-кўрона эргашиб кетолмайман, чунки бу бизни мода оламига қаттиқ боғлаб қўяди. Мен эса трендларни ўзимнинг мижозларимда қўлласам бўладими, бу Тошкент учун долзарб аҳамиятга эга бўладими, дея ўйлаб кўраман. Бу чиройли кўринармикан? Масалан, кескин контуринг (юзни тўқ ранглар, чизиқлар билан бўрттириб кўрсатиш услуби) узоқ вақт тренд ҳисобланди, аммо мен уни пайдо бўлиши биланоқ ёқтирмадим ва у ҳайратланарли даражада оммалашиб кетганда ҳам ёқтиришни хоҳламадим. Мижозларимнинг кўпчилигига ҳам бу ёқмайди. Мен контур, яъни шакл беришга қарши эмасман, лекин у юмшоқ, табиий ва тўғри бўлиши керак. Контур аёлни унинг “аввал” ва “ҳозир” ги кўринишини намойиш қиладиган даражада бутунлай ўзгартириб юбориши керак эмас. У юзнинг маълум бир қисмларини ажратиб кўрсатиши керак, холос, бундан ортиқ эмас.
Визажистликдаги асосий жиҳат – юзни, қалб ҳолатини ҳис қила олишдир. Шунда барча нарса уйғун ва гўзал натижа ҳосил қилади. Доимо инсонни чуқур англаш ва бўёқлар билан ошириб юбормаслик керак. Шунингдек, ҳар бир мижозни эшита олиш ва унинг истакларини инобатга олиш ҳам ўта муҳим.
Агар сизда макияж учун беш дақиқа бўлса, нима қилардингиз?
Беш дақиқада мен ҳаммасига улгураман: ранг бераман, енгил бронзер, румянани қўллайман, кўзларга чизиб, тушь сураман ва лабларимга бальзам суртиб, ҳаттоки юзимга хайлайтер беришга ҳам улгураман.
Сизнинг пардоз - андоз сумкангизда нима ҳамиша бор?
Пардоз-андоз сумкамда тестер ва мини-ўрам кўринишидаги деярли барча нарса: тонал асослар, хайлайтерлар, бронзерлар, ялтироқ лаб бўёқлари, консилер ва ҳаттоки қопқоқлар, кичкина қаламлар бор. Менга уларни олдимда олиб юриш қулай, фавқулодда ҳолатлар учун, десак ҳам бўлади.
Гўзал аёлни қандай таърифлайсиз?
Гўзал аёл, биринчи навбатда, табиий чиройли ва табассум қилувчи аёлдир. У ўзига қараб юради, ўзининг барча ижобий томонларини билади ва уларни тўғри услубда ажратиб кўрсатади. У ўзини яхши кўради ва қандай бўлса, шундайлигича қабул қилади ҳамда ўзига қараб юришдан эринмайди.
Макияжда севимли йўналишларингиз қайси?
Мен табиийликка урғу бериладиган, яъни тоза, порлаб турувчи тери, қалин қошлар (ҳар бир соч толаси тартиб билан алоҳида кўринадиган қилиб бўялган), дўмбоқ ва нам лаблар, енгил румяна ва, албатта, хайлайтер берилган макияж тарафдориман. Мен учун ҳамма мижозни бир хил кўринишга келтириш эмас, балки ҳар бир юзда асл гўзалликни ажратиб кўрсатиш муҳим. Ишга киришишдан олдин юзларни кузатиб, уларнинг ўзига хосликларини аниқлаб оламан. Мен қалин тонал асос қатламидан иборат “ниқоб” лар ва “бўёқ чапланган” юзларга қаршиман. Ҳамма нарсада енгилликни яхши кўраман. Ҳаттоки қалин тонал асосни ҳам тўғри йўл билан, юзни оғирлаштирмасдан бериш мумкин.
Сиз ижодини яхши кўрадиган жаҳон визажистлари борми?
Албатта, бор. Мен кўпгина визажистлар ижодини кузатиб бораман ва ўзим учун қизиқарли ҳолатларни билиб оламан. Улар орасида, масалан, Пет Макгратни кўрсатиш мумкин. У ҳақиқий гуру (буюк устоз) ва янгилик яратувчи инсон. Наташа Власовани ҳам айтишим мумкин. У билан Тошкентда бўлиб ўтган маҳорат дарсларида танишганмиз ва дўстлашганмиз. Биз ҳалигача илиқ муносабатдамиз, унга доим маслаҳат сўраб мурожаат қилиш мумкин, у ҳеч қачон рад қилмайди. Шунингдек, Денис Карташевнинг жасурлиги ва ажойиб ғояларини яхши кўраман. Хин Даш ҳам ўзини тоза ва гўзал макияж орқали жуда чиройли ва аъло даражада ифодалайди. Бундан ташқари, ижодлари менга ёқадиган яна кўплаб визажистлар бор ва уларни кузатиш доимо ёқимли.
Бизнинг ўқувчиларимизга қандай тилакларингиз бор?
Мен барча қиз ва аёлларга улар ўзларига бошқа инсонлар кўзи билан қарашларини, танқид ва норозиликни четга суриб, ўз гўзалликларини англаб етишлари кераклигини доимо таъкидлаб келаман. Шундагина улар ўзларининг нақадар гўзал эканликларини кўришади. Турли баҳона ва кейинга қолдиришларсиз ўзингизни парвариш қилишни бошланг. Шунингдек, барча аёлларнинг ижтимоий тармоқларда оммалашган қиёфаларга эргашмасликларини хоҳлардим. Ўзлигингизда бўлинг – бу анча латофатлироқ.
facebook:https://www.facebook.com/missdimakeupstudio/
instagram: https://www.instagram.com/missdi_makeupstudio/
Асосий тенденцияларни makeup.uz билан бирга кузатинг. Бизни маслахатларимиз ва ечилиш улулларимизни бошкаларга курсатинг , ҳамда нашрларимзга ўзизни фикрингизни изоҳларда тўлдиринг! Телеграм-каналимизга , facebook ва instagram га аъзо бўлинг.